Dima Hasoa-a rel kawng siam hna ngawrh takin thawk mek : NFR

North Frontier Railways chuan Assam-a Dima Hasao-a ruahsur nasa avanga rel kawng chhiate siamṭhat hna chu ruah a sur reng chungin ngawrh taka thawh mek a ni tih a sawi.

May thla chawlhkhar hnihnaah khan ruahsur leh leimin nasa tak avangin Lumding-Badarpur hill section-a rel kawng, km 85 vela thui a chhia a ni. Hei vang hian Tripura, Mizoram, Manipur leh Assam hmun ṭhenkhata rel service a bahlah phah.

Rel kawng hi hmun 61-ah a chhia a, heng zinga hmun 46 hi siamṭhat fel tawh niin, hmun dang 15-ahte ngawrh takin hna hi thawh a ni. Railways lam chuan July 10 aṭangin rel hi dan pangngaia service leh theih an beisei.

Guwahati-a leiminah mi 4 an thi
Assam-ah hian Thawhṭanni zan khan ruah nasa takin a sur leh a, ruahsur vang hian Guwahati-a Boragaon area-ah lei a min leh a, mi pali a chhilh hlum.

Mi pali thite hi lei minna bula cheng, hnathawka inhlawhfate an ni. An ruangte hi lakchhuah an ni tawh a ni.

Ruahsur nasa avang hian Guwahati leh a chhehvelah tui a tling leh nasa hle. Kamrup Metro district thuneitute chuan mipuite chu a ṭul hle a nih loh chuan pawn chhuak rih lo turin an ngen.