Manipur-a RPF-PLA pawl hruaitute sorkar kutah inpe
Manipur-base undergound Revolutionary People’s Front (RPF-PLA) hruaitute chu Thawhṭanni khan chief minister N Biren Singh kutah an inpe.
Kar liam ta khan United Tribal Liberation Army - James (UTLA-J) pawl amite chu an chairman hoin member 14 sorkar kutah an inpe tawh bawk a, an ralthuamte pawh an pe lut nghal a ni.Imphal-a 1st Manipur Rifles Banquet hall-ah hel inpete lawmna inkhawm hi buatsaih a ni.
Chief Minister chuan Thawhṭannia sorkar kuta inpe zingah RPF-PLA-a Lt Colonel, Irom Ibotombi Meitei pawh a tel tih a sawi a, tun hnaia hel pawl member eng emaw zat kawng dik zawh duh a sorkar a inpe an pung zel chuan prime minister Narendra Modi rorelna an rin tawk zia a tilang a ni, a ti.
Irom Ibotombi Meitei hi kum 56 mi niin, Nambol Thangtek-a cheng a ni. Kum 1994-1995 khan helpawl hi a zawm a, sorkar kuta a inpek hma hian an pawla health and family welfare department-a deputy assistant secretary a ni.
CM Singh chuan RPF(PLA) senior member-te inpekna chuan an state-ah boruak ralmuang leh muanawm a awm chho ṭan zel tih a tilang a ni tiin, union home minister Amit Shah-a'n hel inpe duhte lakah FIR hman a ni dawn lo tih a lo sawi tawh chu sorkar chuan a zawm zel a ni, tiin a sawi.
State sorkar chuan hel inpete himna tur leh chhawmdawlna tur chu a ngaihtuah sak zel dawn tih sawiin, CM chuan hel inpe lawmna hun pawh hi an la hman chhoh zel ngei a rin thu a sawi a ni.