Manipur-ah Dec 31 thleng zan curfew puang

Manipur sorkar chuan an state-a Covid-19 kai an pun belh zel avangin hri darh tur venna kawng khat atan state pumah December 31 thleng zan lam curfew a puang. 

Chief secretary Rajesh Kumar-a'n thupek a tichhuahah, thupek dang a awm leh hma chuan December 31 zan dar 6 aṭanga a tuk zing dar 4 thleng curfew puan a ni. Hemi rual hian essential service, chakkhai phurtu motor leh official duty-te chu curfew hian a huam lo ang. 

Hemi hun chhung hian thil lawmna buatsaih pawh chhungkaw bil chauha neih phalsak a ni a, ṭul leh pawimawh zual bikah chuan mi 20 chin awmkhawm phal a ni. 

Bazar hmuna mipui pungkhawm tur venna atan state chhunga bazarpui pahnih, Thangal leh Paona Bazaar hawn an nih dan pawh ruahmanna siam niin, Pathianni erawh chuan eng dawr mah hawn phal a ni lo thung. 

Manipur-ah hian Covid-19 kai hmuh chhuah tawh hi 24,514 an tling tawh a, an zinga 21,006 chu enkawl dam an ni tawh. Hri kai enkawl mek 3,252 awmin, hripui thihpui hi mi 256 an awm tawh a ni.