Assam : Pranab Mukherjee-a'n river festival lian ber hawng

President Pranab Mukherjee chuan India rama river festival ber ‘Namami Brahmaputra’ chu Assam khawpui Guwahati-ah nimin khan a hawng.

Festival hi district 21-ah hman a ni a, Brahmaputra lui kaihhnawiha sumdawnna, tourism leh cultural thil hrang hrangte tarlan a ni. He hun hi Tibetan sakhaw puithiam Dalai Lama pawhin a hmanpui a, ani bakah hian union ministers Nitin Gadkari leh Mahesh Sharma bakah sorkar mipawimawh eng emaw zat an tel a ni. Chief Minister Sarbananda Sonowal chuan, he festival hi khawvel huapa an hnam zia rang pho­chhuahna a nih thu sawiin, mipuite chu hlim taka hmang turin duhsakna a hlan.

Assam Industry and Transport Minister Chandramohan Pato­wary chuan, Brahmaputra lui lian hian kum tin chhiatna nasa tak a thlen ṭhin a, mahse mi tam tak chuan eizawnnan an hmang tih a sawi. State economy chawikanna kawngah pawimawhna lian tak a nei a, chhiatna a thlente hre reng lo a, a eng zawnga thlir a ṭul a ni, a ti. Festival chuan inpumkhatna kawngah pen khat talin hmasawnna a thlen a beisei tih sawiin, inunauna ṭha zawk siam theitu a ni, a ti. Patowary chuan, Brahmaputra lui hmangin Bangladesh leh Bhutan bakah ram dangte nen sumdawnna an kalpui tih sawiin, hei hian mi tam tak tan eizawnna a siam a, state pawhin nasa takin hma a sawn phah a ni, a ti bawk.

Festival-ah hian cultural prog­ramme - aarti, film show, exhi­bition leh traditional sports-te a awm a, ni nga chhung hman a ni ang. Prime Minister Office chuan festival pual hian state mipuite chu duhsakna a hlan. Festival chhim tur hian ram pawn Japan, Laos, Vietnam leh Singapore aṭang te in mi eng emaw zat an fuankhawm a ni. ‘Namami Brahmaputra’ theme song ‘Papon’ chu Hindi leh Assamese ṭawngin CM Sonowal chuan a lo tlangzarh tawh a ni.