Tripura : TMC leh BJP-te'n CM bang turin phut

Tripura-a opposition party lian pahnih Trina­mool Congress (TMC) leh BJP-te chuan Chief Minister Manik Sarkar chu zirtirtu lak dan fel tawk lo avangin bang turin an phut.

Tun hnai khan Supreme Court chuan state sorkarin zirtirtu 10,323 a lak danah thil dik tawk lo a awm tih a tarlang a, hei hi Tripura High Court pawhin hun eng emaw chen a lo chhui tawh a ni. High Court chuan zirtirtu lakna tur recruitment tihchhuah chu a dik lo tih a tarlang a, hei hi Supreme Court-ah thlen a ni. He thil thleng hi Tripura BJP-te chuan nasa takin an dodal a, party hruaitu Biplab Deb chuan CM Sarkar chu bang turin an phut tih a sawi. TMC hruaitu Sudip Roy Burman pawhin Sarkar chu mawhphurtu a nih avangin bang ngei turin an phut tih a sawi a, dik lo taka zirtirtu lakna kalpui a ni chu an dem takzet tih an sawi.