AASU-te'n vawiinah nawrh huaihawt dawn

Assam-a zirlai pawl All Assam Students Union (AASU)-te chuan vawiin hian sorkar laipuiin Citizenship act siamṭha tura thutlukna a siam duh lohna lantirin Guwahati-ah nawrh an huaihawt dawn.

AASU-te chuan Assam Accord siamṭhat chu an remti ngai dawn lo tih an sawi a, dan loa ṭhenawm ram Bangladesh aṭanga Assam-a lut te chu khua leh tui nihna pek theih an nih loh thu an sawi. AASU president Dipanka Kumar Nath chuan, "Kum 1971 hnua lama Assam-a lut te chu khua leh tui nihna pek theih an ni tawh lo a, foreigner an ni. An sakhaw zui avang emaw, an inbenbel vang emawin khua leh tui nihna an nei chuang lo" a ti. AASU nawrh huaihawt tur hi pawl hrang hrangte chuan an thlawp tur thu an sawi a ni.

AASU president Kumar Nath chuan, an hmalakna hi pawl hrang 29-te'n an thlawp tur thu an sawi tawh niin a sawi a, an zingah hian All Assam Tribal Sangha, All Assam Tribal Youth League, All Bodo Students’ Union, All Tai Ahom Students’ Union, All Adivasi Students’ Union leh Sadou Asam Karmachari Parishad (SAKP)-te pawh an tel tih a sawi. Purvottar Marowari Sanmilan, Purvottar Hindustani Sanmilan, Purvottar Marwari Yuba Mancha, Purvottar Hindustani Yuva Samaj leh All Assam Bhojpuri Parishad-te pawhin sorkar laipuiin Citizenship act siam ṭha tura thutlukna a siam chu an dem tih an sawi a, AASU-te nawrh huaihawt an thlawp tur thu an sawi ve bawk.

Zirlai pawl hruaitute chuan pawl hrang hrang hruaitute chu meeting an neihpui tawh a, an hmalak dan tur an sawi ho. Pawl hrang hrangte chuan Bangladesh aṭanga Hindu sakhaw zuitu Assam-a lutte chu khua leh tui nihna pek an remtih loh thu leh, sorkar laipui thultukna an dem thu an sawi a ni. Sorkar laipui chuan Hindu sakhaw zuitu, India rama khawsa te chu khua leh tui nihna pek an nih theih nan Citizenship Amendment Bill 2016 chu a duang a ni. Bill hi Citizenship Act, 1955 siamṭhatna a ni a, dan loa Afghanistan, Bangladesh leh Pakistan aṭanga India rama lut, Hindu, Sikh, Buddhist, Jain, Parsi leh Kristian sakhaw zuitute khua leh tui nihna pek theih an ni.

Assam-ah hian Bangladesh aṭanga dan loa lut an tam em em a, heng mite khua leh tui nihna pek hi pawl tam takin an dodal a, chief minister hlui Tarun Gogo-a pawhin nasa takin a lo sawisel tawh a ni. Citizenship (Amendment) Bill, 2016 duh lohna lantir hian pawl hrang hrangte chuan New Delhi-ah nawrh an lo huaihawt tawh bawk.