China ni loin, Tibet nen AP hi an inri a ni : Khandu

Arunachal Pradesh chief minister Pema Khandu chuan China-in Arunachal Pradesh chu Tibet region huam chhunga mi a ni tia, a ram chin nia a chhal fo chu chhangin, an state chu China ni loin, Tibet nen zawk an inri a ni tih The Hindu-in a kawmnaah a sawi. 

CM Khandu chuan, "Arunachal hian direct-in China nena ramri an inṭawm lo a, Tibet nen an inri zawk a ni. Khawvel pawhin China-in Tibet a luah hi an hre vek a ni," a ti. 

Khandu hian a hma pawhin hetiang lam hawi hian a lo sawi chhuak tawh a, Ladakh-a Galwan Valley-a India leh China sipaite an inep lai khan China-in Tibet ram a luahsak chungchang hi a sawilang tawh bawk. 

China lamin a chuhpui reng vangin sorkar laipui pawhin AP hi a theih angin a thuam chak reng a, ramri hrula kawngpui, Frontier Highway pawh indo a thlen palh thulha sipaite  chetvelna ṭha leh rang zawk a awm theihna atan thuam ṭhat a ni. Khandu chuan an state chungchanga China inrawlh zel avangin foreign funding lamah pawh harsatna an tawh phah tih a sawi a, a pung tlem zawka loan pe ṭhintu, World Bank leh Asian Development Bank-te pawhin an state tan chuan loan an pe ve thei lo a, hei hi pawi a ti hle tih a sawi. Mahse sorkar laipui lamin project hrang hrangah a theih anga puiin, tunah hian 1,600 km Trans-Arunachal Highway project pawh  kalpui mek a ni. 

Sorkar laipuiin an harsatna tawhte hriatthiam puiin, an state pawh a ngaihsak bik hle a ni tih Khandu chuan a sawi. 

Kum 1962-a siam, advance landing ground paruk pawh tihchangtlun niin, Trans-Arunachal High­way pawh harsatna karah thawh mek zel a ni, a ti.