Muslim-te terrorist anga sawi hi a dik lo : Dalai Lama

Tibetan sakhaw puithiam Dalai Lama chuan Muslim-te terrorist anga sawi ṭhin chu a dik loh thu leh, a pawm ve loh thu a sawi.

Dalai Lama hian Assam-a chanchinbu lar ‘The Assam Tribune’-in platinum jubilee a lawmna a hmanpuinaah he thu hi sawiin, "Kum zabi 21 hnu lamah khawvelah remna leh muanna a tlahniam zel a, India ramah ngei pawh thil duhawm lo tak tak a thleng chamchi a, hengah hian Muslim-te chu pawikhawihtuah kan puh mai ṭhin. Mahse hei hi a dik ber lo a, terrorist an ni bik lo" a ti. Tharum thawha pawikhawihna thlen ṭhintute sawi nan leh pawikhawih ṭhinte Muslim terrorist anga sawi ṭhin chu a dik lo a ni, a ti. Sakhaw hrang hrang zuitute chu hmangaina leh inremna nei zual zel turin a duh thu a sawi bawk.

Tibetan sakhaw puithiam chuan, khawvelah inrikrapna te, tharum thawhna leh mi pawisawi lo thahna a thleng fo tih sawiin, hei hi ngaihthah theih a ni lo, a ti. Ei tur neih loh avanga rilṭama thi an awm ṭhin chu pawi a tih thu sawiin, hemi titawp tur hian hma lak a ngaih thu a sawi. Heng zawng zawng hi ṭawngtaina ngawt chuan a sukiang vek thei lo nia sawiin, mi mal, chhungkua leh khawtlang anga hma lak a ngai a ni, a ti. Remna leh muanna chu a ngaihpawimawh thu sawiin, hemi tur hian zirtirna pek a ngai tih a sawiin, zirchianna neih te, hemi chungchang sawihona buatsaih te chu thil ṭul tak a nih thu a sawi.

Dalai Lama hian Inrinni khan Assam khawpui Guwahati a thleng a, April 4-ah Arunachal Pradesh a pan leh dawn a ni. Dalai Lama hi amah ngaisangtu leh sorkar mi pawimawhte chuan Lokapriya Gopinath Bordoloi International airport-ah an lo hmauk a, hmun hrang hrangah thu a sawi dawn a ni. A lehkhabu ziah 'My Land and My People" tih Assamese ṭawnga lehlin chu a tlangzarh dawn bawk a, nimin khan 'Namami Brahmaputra' festival a hmanpui bawk a ni.