China-in Dalai Lama-a'n AP a tlawh tur dem

China chuan India-in Dalai Lama-a Arunachal Pradesh tlawh a phalsak chu a dem thu kar kalta Zirtawpni khan a puang a, ram pahnih inkar boruak tichhe thei thil a nih thu a sawi.

Beijing chuan India chu Tibet chungchanga intiamkamna nei tura a phut thu a sawi. Chinese Foreign Ministry thu­puangtu Lu Kang chuan, "Dalai Lama-a'n Aruna­chal a tlawh tur hi kan ngaithutak takzet a, China-India border chung­changah China chu a dinna ngaiah a ding a, a ram chinah a chiang a ni" a ti. China chuan Arunachal Pradesh hi South Tibet bung pakhatah a chhal a ni. Lu Kang chuan, India-in Dalai Lama hi a hrechiang a, chutichung chuan a ram chhung hmun ṭhenkhat tlawh turin a la sawm tho a, hei hi ram pahnih inkar tichhe thei a ni tiin, India-in Dalai Lama-a India hmarchhak tlawh a phalsak chu a dem thu a sawi.

Dalai Lama hian April 4-13 chhungin Arunachal Pradesh-ah hun a hmang dawn a, hei hi China chuan a helh hle a, Chinese Foreign Ministry chuan a demna thuchhuah a siam fo a ni. Chinese Foreign Ministry chuan March 3 khan India-in Dalai Lama-a Arunachal tlawh a phalsak chu a dem thu a lo sawi tawh a, kar kalta Zirtawpni khan thuchhuah a siam leh. Kum 2016-a Dalai Lama-a'n Arunachal a tlawh tur thu puan a nih leh, ram chhunga hmun hrang hrang tlawh phalsak a nih thu puan a nih khan China chu a lo ṭawngchhuak tawh bawk. Hei bakah hian American Ambassador to India Richard Verma-a'n nikuma Aruachal Pradesh a tlawh ṭum khan China chuan India a lo khak tawh bawk. Richard Verma hian India-China inrina Line of Actual Control (LAC) a tlawh a, hei hi China chuan na takin a sawisel a ni.

Hetih lai hian Union Minister Kiren Rijiju chuan China-in na taka India a khak fo chu ṭha tih loh thu leh, insum deuh tura a duh thu a sawi. Dalai Lama-a'n Arunachal a tlawh tur chungchangah ram pahnihte inlaichinna tichhe thei thil a awm loh thu sawiin, Dalai Lama-a'n a tlawh avanga Arunachal mipuite a lawmpui thu a sawi.