Supreme Court-in zirtirtu lak a thara kalpui turin Tripura sorkar a hriattir

Supreme Court chuan Tripura sorkar chu zirtirtu 10,000 lak danah thil fel lo a awm tih sawiin, hna lak hi a thara kalpui turin hriattirna a pe.

Kum 2010 leh 2013 khan Tripura sorkar chuan zirtirtu ṭhahnem tak a la a, mahse hn alak danah hian thil fel lo a awm tih SC chuan a tarlang. Justice A K Goel chuan hemi chungchangah hian May 7, 2014 khan Tripura High Court chuan hriattirna a lo pe chhuak tawh tih sawiin, December 31, 2017 ral hma ngeiin hna lak hi a thara kalpui tur a ni, a ti. Hemi atan hian court chuan state sorkar hnenah April 30, 2017 ral hmaa a thara advertisement tichhuak turin a hriattir a, dil theih hun chhung hi May 31 thleng hawng turin a ti bawk. Hetih lai hian hna lak hi a thara kalpui a nih hma chuan a thawk laite chu dan pangngaia thawh zawm phalsak an nih thu a sawi.

Advertisement hi a thara chhuah ni dawn mah se candidate-te chu an kum leh education qualification-ahte hriatthiamna thui tak pek an ni ang. Hna lakah hian a theih chin chinah Right of Children to Free and Compulsory Education Act, 2009 zawm tura tih a ni. Tripura sorkar chuan kum 2010 khan zirtirtu, post-graduate 1,100 leh graduate 4,617 zet a la a, kum 2013 khan graduate teacher 4,606 zet a la leh bawk. Mahse zirtirtu lak danah hian thil fel tawk lo a awm avangin Tripura High Court chuan a ngaihtuah hnuah, Suprem Court-ah ngaihtuah leh a ni a, SC chuan thupek hi a tichhuak ta a ni.