Meghalaya sorkar-in Right to Education Act a kalpui ṭha tawk lo

Comptroller and Auditor General (CAG) report chuan Right To Education Act, 2009 kalpui kawngah Megha­laya sorkar chu a hlawh­chham tih a tarlang.

CAG chuan Megha­laya sorkar hian Right to Education Act a nih tur anga a kalpui loh avangin, zirtirtu post 1,700 vel zet hnawhkhah a nih loh bakah, zirtirtu ṭanglai zinga 70% vel zet chu training pawh nei mumal lo an nih thu a tarlang. CAG report March 31 khan Assembly session-ah pharh a ni a, primary school-te'n zirtirtu an indaih lo hle tih tarlan a ni. Report aṭanga a landan chuan zirtirtu indaih lohna hi 1,748 vel zet a ni a, primary school 224-te chuan zirtirtu pakhat chauh an nei a, school 68-in science leh maths zirtirtu an nei lo a ni.

Zirtirtu tam zawk te chu training pawh nei mumal lo an nih thu tarlan a ni bawk.

RTE Act, 2009 atan hian cheng vaibelchhe 900 vel zet hmanral a ni tawh a, uniform leh textbook-te chu a thlawna sem a ni. State sorkar chuan hemi atan hian vaibelchhe 908.46 vel zet a hmang ral tawh a, mahse sorkar laipui chuan eng emaw vangin sum hi a la pe chhuak mumal lo niin CAG report-ah hian tarlan a ni. RTE Act, 2009 atan hian state sorkar chuan kum 2010-16 chhungin vaibelchhe 222.23 a tum tur a ni a, sorkar laipuiin vaibelchhe 2,000 a tum ve bawk ang. Mahse tun dinhmunah sorkar laipui chuan vaibelchhe 830.16 a pe chhuak tawh a, state sorkar pawhin vaibelchhe 78.30 a hmang ral tawh tih tarlan a ni.

CAG report chuan school naupang zirna chhunzawm lo te chu a ngaihthah niin a tar­lang bawk a, hetiang zirlai hi 6% an la awm thu tarlan a ni. Zirlai 25% chu khawsak har­sa zawk leh, hnam hnuai­hnung an ni. State Advi­sory Committee leh State Commission for Protection of Child Rights-te chuan an hna an thawk ṭha tawk lo tih a tarlang bawk.