Sorkar laipuiin Majuli tihhmasawnna tur sum ruahman

Union Minister of State for Tourism and Culture Dr Mahesh Sarma chuan, Assam-a Majuli thliarkar tihhmasawnna turin sorkar laipui chuan cheng vaibel­chhe 98.35 a ruahman thu a sawi.

Union Minister Mahesh Sarma leh Assam Chief Minister Sarbananda Sonowal-te chuan tun hnai khan meeting an nei a, state Tourism minister Himanta Biswa Sarma pawhin a telpui a ni. Mahesh Sarma chuan khawvela river island lian ber Majuli tihhmasawnna turin sorkar laipui chuan sum a ruahman thu hi sawiin, World Heritage Site-a puan a nih theih nan hmalak a nih tur thu a lo hrilh a ni. Majuli hi 'Swadesh Darshan Scheme' hnuaiah kawng hrang hrang tihhmasawn tum a ni a, infrastructure changtlung tak din tum a ni a, heng zingah hian interpretation centre din te leh watch tower sak te pawh a tel a ni.

Project atan hian sum ruahman fel a nih tawh tih Union MIniater chuan sawiin, a thawh khatna atan sorkar laipui chuan March 31 khan cheng vaibelchhe 19.67 a pe chhuak tawh a ni, a ti. Unesco World Heritage Site-a Majuli telh a ni ve theih nan hian sorkar laipui chuan state sorkar nen ṭangkawpin hma a la zel dawn a ni. Union ministry chuan Brahmaputra Ashok Hotel chu Majuli-ah hian sawn turin a ruahman a, hun reilo teah tihfel hman beisei a ni. He hotel hi Guwahati-a awm a ni a, three-star hotel niin state sorkar leh ITDC-ten an enkawl a ni. Prime Minister Narendra Modi pawhin Brahmaputra Ashok Hotel hi sawn a remti niin Mahesh Sarma chuan a sawi bawk.

Assam CM Sonowal chuan Union tourism ministry hmalakna chu fakawm a tih thu sawiin, hmalakna te chu state sorkar chuan a thlawp zel tur thu Union Minister hi a hrilh. Majuli hi Bramaputra lui thliarkara awm a ni a, kum 2016 khan khawvel-a river island lian berah Unesco chuan a puang a ni. Assam CM Sonowal hi kum 2016 state assembly election khan, Majuli bial aṭang hian BJP ticket-a thlan tlin a ni a, chief minister atana lakluh a nih hnu lawkah district-ah hlankai a ni zui bawk.