Assam paper mill khar taka thawkte chhawmdawlna tur June 30-ah state sorkarin a pe chhuak dawn

Assam sorkar chuan Nagaon leh Cachar paper mill khar taka thawktute chhawmdawlna tur, Rs vbc 500 chu June 30 hian a pe chhuak dawn.

Chief minister Himanta Biswa Sarma chuan Diphu-a Assam BJP state executive meeting tawp ni, Nilaini khan he thu hi sawiin, "Paper mill-a thawktute tan, June 30-ah financial package Rs vbc 500 chu kan pe chhuak dawn a ni. Kum tam tak hah leh rim taka an lo thawh tawhna lawmman chu kan pe dawn a ni," a ti.

June 30-ah paper mill pahniha thawktu tinte chuan an sum dawn tur ang chu an bank account-ah an dawng vek dawn tih CM chuan a sawi a, heng mill pahnih khar vang hian thawktute hian sum lama harsatna tam tak an tawh thu a sawi bawk.

Panchgram, Hailankandi district-a Cachar Paper Mill hi kum 2015, October thla aṭang leh, Morigoan-a Jagiroad-a Nagaon Paper Mill hi kum 2017, March thla aṭang khan khar an ni tawh a ni. Heng paper mill-a thawkte hi thla 64 zet hlawh pek an ni tawh lo. An hlawh tangkhang chhung hian paper mill pahniha thawktu zinga 106 zet chu an thi hman tawh a ni. Sum lama harsatna nasa tak an tawh avangin dam lo inenkawlna tur sum pawh an nei lo tih an sawi. Assam sorkar chuan kumin kumtir lam khan paper mill hluihlawn tawh pahniha an thil neihte chu a leisak a ni.

State sorkar chuan 'Orunodoi' scheme hnuaia hmeichhiate chhawmdawlna a pek ṭhin, thla khata Rs 1,000 chu kumin September thla aṭangin Rs 1,250-ah tihpun a rel bawk. Orunodoi scheme hi hripui leng vanga harsatna tawkte, chhungkaw enkawltu ber hmeichhiate puihna tura duan niin, kum 2020 Ocotober thla khan tlangzarh a ni. He scheme hnuaiah hian chhungkuaa eizawngtu ber, hmeichhiate chu chhawmdawlna, thla khatah Rs 830 pek ṭhin an ni a, kum khat kalpui a nih hnuah nikum khan Rs 1,000 ah tihpun a ni. Mi nuai 20 vel hnenah chhawmdawlna hi pek niin, a dawng thei tur mi dang nuai ruk an awm belh leh dawn bawk.