Guwahati-ah ruahsur vangin chhiatna thlen belh

Assam khawpui, Guwahati-ah Thawhlehni aṭang khan ruah nasa taka a sur leh avangin khawpui chhung hmun tam takah tui a tling leh nasa hle a, hmun eng emaw zatah lei a min thar leh bawk.

Kuminah leimin leh tuilian vangin Assam-ah hian mi 42 an thi tawh a ni. Thawhlehni khan Boragoan area-ah leimin nasa takin mi pali a chhilh hlum.

Assam State Disaster Management Authority (ASDMA) chuan leimin khan Geetanagar, Sonapur, Kalapahar leh Nijarapar area kalpawhnate a hnawh tih sawi. Khawpui chhunga Anil Nagar, Nabin Nagar, Rajgarh Link Road, Rukminigaon, Hatigaon leh Krishna Nagar-ahte tuiin kawngpui leh inte a chim nasa a, heng hmuna awmte chhanchhuah leh chhawmdawl hna thawk tur hian NDRF leh SDFR-te tirh an ni.

Kamrup Metropolitan district thuneitute chuan mipuite chu ṭul bik thil a nih loh chuan pawn chhuak lo turin a ngen. Deputy commisioner Pallav Gopal Jhna chuan Regional Meteorological Centre (RMC)-in Inrinni thlenga ruah a la sur chhunzawm zel dawn nia a sawi avangin, zirna in hrang hrang-te chu class kal rih lo turin a ti bawk.