Itanagar : Kawngpuia bawlhhlawh paihte sum chawi tir dawn

Arunachal Pradesh khawpui, Itanagar-ah chuan kawngpui tibal a, bawlhlawh paih ṭhinte chu sum chawi tir zel an ni dawn.

Itanagar Municipal Corporation (IMC) chuan Nilaini khan he thupek hi a tichhuak a ni.

IMC mayor Tame Phassang chuan, "IMC chuan vantlang hmun leh public institution-a bawlhhlawh paih ṭhinte chu sum a chawitir zel tawh dawn a ni. Bawlhhlawh paih chauh ni lo, vantlang hmuna chil chhak te, zunin ni loa zungte pawh chawitir an ni bawk ang. Motor aṭanga thil eina kawr leh bottle paihte pawh hrem tel an ni dawn bawk a ni," a ti.

Gauhati High Court Itanagar Bench chuan May thla khan IMC hnenah Solid Waste Managment Rules,2016 hnuaia khawpui chhunga bawlhhlawh sawngbawl dan mumal taka kalpui tura hriattirin, kawngpuia bawlhlawh paih leh hnawmhnawk siamte chawi tir turin a lo hrilh tawh a ni.

IMC-101 App tlangzarh
Nilaini vek khan mayor Phassang chuan Itangar Capital Region (ICR)-a chengten IMC awlsam taka an dawr theihna tur, mobile application 'IMC-101' chu a tlangzarh bawk.

He mobile application kaltlang hian khawpuia chengte chuan bawlhhlawh dahkhawm chungchangahte complaint an thehlut thei dawn a, hei baka khawpui vawn fai kawnga hmalakna tura rawtna an neihte pawh an thehlut thei bawk ang.