Tripura CM hlui puhna chungchanga BJP ngawih chhan zawt

Tripura eptu hruaitu, CPI-M leader Manik Sarkar chuan chief minister hlui, BJP hruaitu Biplab Kumar Deb-a eirua puhna hrang hrang awm mek kara BJP state unit an ngawih tlat chhan a zawt.

Manik Sarkar chuan, "Nitinin tualchhunga chanchinbuah Chief Minister hlui hi eirua puhna thuziak a awm reng a ni. Hetih laia an party lamin heng thil an ngaihven duh loh leh an ngawi tlat hi mak ka ti a, an ngawi tlatna hian an puhna hi a dik tih a tilang zawk a ni," a ti.

State leh central-a BJP sorkar chu sawisel zuiin, "BJP hian centre leh state-ah ro an rel mek a, mahse he double-engine sorkar hian mipui nawlpuite tan phurrit a siam zawk a ni," tiin thil man a sang zel a, petroleum product - petrol, diesel leh khawnvartui mante chu nasa takin a pung chho a, hei hian nitin mamawh man thlengin a nghawng zel a ni, a ti. State sorkar chuan mipuite phurrit chhawk tumin hma a la lo a,an phurrit tizual turin petrol leh diesel-ah chhiah a la zawk a ni, tiin a sawi.