Dalai Lama-a'n Arunachal a thleng Khaw ṭhat loh vangin Tawang a tlawh hun tur sawn

Tibetan sakhaw puithiam Dalai Lama chuan nimin khan Arunachal Pradesh a thleng a, mahse Tawang a tlawh hun tur chu khaw ṭhat loh avangin sawn hlat a ngai a, a hun tur erawh tarlan a ni lo.

Dalai Lama hian April 1 khan Assam a thleng a, hun eng emaw chen a hman hnuah Thawhṭanni khan Arunachal hi a pan a ni. Nimin zing khan Tara temple a tlawh a, April 12 thleng a cham dawn a ni. A cham chhung hian India-China border kianga awm Tawang district a tlawh dawn a, a tlawh hun tur hi a tarlan a ni lo. Tawang-ah hian mi hring 40,000 vel an cheng a, China chuan a ram chinah a chhal a, India nen vawi tam tak an innghirngho phah tawh a ni. Dalai Lama-a'n Tawang a tlawh tur thu puan a nih pawh hian China chuan nasa takin a sawisel a ni.

April 10 khian Dirang-ah sakhaw lam zirtirna hun a hmang dawn a, Bomdila-ah hun a hmang leh ang a, April 12-ah Arunachal khawpui Itanagar aṭangin Tibet-ah a let leh dawn a ni. Dalai Lama hian kum 2010 khan Aruanchal hi a lo tlawh tawh bawk a ni.

Hetih lai hian External affairs ministry chuan thu chhuah siamin, Dalai Lama-a'n Arunachal a tlawh chu thil lawmawm tak a ni a, sakhaw hruaitu a ni a, ram mipuiten an zah em em a ni tih a sawi. Ram chhung hmun hrang hrang a tlawh phalsak a ni a, sakhaw thila zirtirna a pek a rem lohna a awm lo, a ti. Union Minister of State for Home Affairs Kiren Rijiju pawhin Arunachal mipuite chu Tibetan sakhaw puithiamin a tlawh avanga a lawmpui thu a sawi. Rijiju chuan China-in 'One-China’ policy a kalpui chu a zahsak thu sawiin, Dalai Lama-a'n Arunachal a tlawh chuan ram pahnihte inkarah ngawng ṭha lo a neih a rin loh thu a sawi.

Minister Rijiju chuan, India chuan ram pahnih inkar tihchhiat a duh loh thu sawiin, chu chu China duh dan pawh a nih a rinawm a ni, a ti. Dalai Lama vang hian ram pahnih inkar a khik phah a rinawm loh a, Aruanchal mipuite pawhin China nena inlaichinna ṭha tak nei an duh tih a sawi. Hetih lai hian Chinese foreign ministry chuan Dalai Lama-a'n Arunachal a tlawh tur chungchangah hian India khak zawngin thu a lo chhak chhuak tawh thung a ni.