Manipur-ah ruahsur vangin nunna chan awm leh

Manipur-ah tunlai hian ruah a sur nasa thei hle a, tun hnai khan nunna chan pahnih an awm leh a ni. Kar hmasa khan ruah sur leh thlipui tleh avangin nunna chan pahnih an lo awm tawh bawk.

Ruahsur hian hmarchhak state Mizoram leh Meghalaya pawh a nuai a, hmun hrang hrangah chhiatna a thleng a ni. Thli leh ruah hian Manipur-ah chenna-in eng emaw zat a tichhe tawh a, mi 10 chuangin hliam an tuar bawk. State sorkar chuan chhiat tawkte buaipui tur hian action committee a din a, ruahsur nasa taka vanga tui lianin a tihbuaite chhanchhuah hna an thawk bawk dawn a ni. Consumer Affairs and Food Public Distribution Minister Karam Shyam chuan chhiatna tawkte chhawmdawlna chu sorkarin a ngaihtuah sak dawn tih sawiin, nunna chan chhungte pawh zángnadawmna pek an nih tur thu a sawi.

Deputy Chief Minister Yumnam Joykumar chuan Thawhṭanni khan tui lenna hmun hrang hrang te a tlawh kual a, harsatna thlen dan kimchang report thehlut turin thuneitute a ngen. Hetih lai hian action committee hmalakna duh khawp lo mi tam tak an awm a, sorkar chu chak zawka hma la turin an phut a ni. Irrigation and Flood Control Minister Leppao Haokip pawhin Imphal leh a chhehvela tuilennna hmun te a tlawh. Minister chuan tui len chhan chu Manipur University-in hmun ṭhenkhata tuikhuah a siam vang niin a sawi a, heng tuikhuahte hi mipuite pawhin tihchhiat an duh thu an sawi.

Imphal-ah hian chenna-in eng emaw zat chu thli-in a chhem chhia tih tarlan a ni bawk.

Manipur University complex chhunga Kakwa, Singjamei, Waikhom Leikai leh a chhehvel te chu tuilian hian a tibuai nasa hle nia tarlan a ni a, Manipur University (MU) thu neitute pawh chak zawka hma la tura ngen an nih thu minister Letpao Haokip chuan a sawi. Ruahsur nasa avang chhiatna thleng hian Imphal West leh Imphal East pawh a nghawng nia tarlan a ni.

Meghalaya khawpui Shillong-ah pawh ruahsur leh thli tleh hian chenna-in eng emaw zat a tichhia a, rial a tlak nasa bawk avangin mi tam takin harsatna an tawk a ni. Hmun ṭhenkhatah chuan rial hian kawngpuia lirthei chevel a tibuai a, a thenfai hna thawh a ngai hial nia tarlan a ni. Rial tla hian chenna-in bakah, thlai chin eng emaw zat a tichhia a ni. South West Khasi Hills-ah chuan Pathianni-a rial leh ruah sur nasa tak khan thingtlang khaw 11-a chenna-in 300 vel zet chu a tichhia. Hetih lai hian chhiatna thleng avang hian thi leh hliam an awm hriat a ni lo.