Manipur CM-in bank te inzarpharh turin ngen

Manipur Chief Minister N. Biren chuan bank hrang hrangte chu hmun zau zawkah inzarpharh turin a ngen.

Manipur-ah hian Department of Information Technology hmalaknain, digital transaction inzirtirna hun 'Digi-Dhan Mela' buatsaih a ni a, he hun hi CM Biren hian a hmanpui a ni. Biren hi CM atan lakluh a nih hnuah mipui hmaa a inlanna hmasa ber a ni a, Mela hi chief guest niin a hmanpui a ni. Biren chuan, eirukna dolet tur leh langtlang sorkar siam tur chuan digital transaction a taka hman a ngai tih sawiin, hemi tur hian hma lak mek zel a ni, a ti. National bank-te bakah, state leh rural bank-te chu hmun zau zawkah inzarpharh tura a duh thu sawiin, hmun kilkhawr thleng phak tura a duh thu a sawi.

CM Biren chuan, Manipur chu pawl hrang hrangte nawrh huaihawt lohna state ni tura a duh thu a sawi bawk a, hemi tur hian mipuite chu thawhpuiah a sawm a ni. Sorkar kar nana nawrh huaihawt ṭhin chuan mipuite nasa taka a ngawng ṭhin thu sawiin, a theih chinah thu hmanga chinfel ṭhin ni thei se a duh tih a sawi. Sorkar hmalakna dodal zawnga chetna reng reng a awm an remti dawn lo tih sawiin, state dangte entawn tlaka khawsak a ngai a ni, a ti bawk.

'Digi-Dhan Mela' hi Union Minister of State (Home Affairs) Kiren Rijiju, Minister of State (Railways) Rajen Gohain, Dy CM, Parliamentary Secratry bakah, Rajya Sabha MP MC Mary Kom-te'n an hmanpui a ni.