Assam Police-ten Congress hruaitute an hreng

Delhi-a Congress party worker lungawi lohna lantirte, party headquarters chhunga Delhi police-ten an luhchilh nia sawi chungchanga lungawi loh lantirtu, Assam congress president Bhupen Kumar Borah leh deputy leader of opposition Rakibul Hussain-te chu Ningani khan Assam police-ten hun rei vak lo an hreng.

Congress hruaitute leh party worker-te chuan BJP kaihhruai sorkar duh lohna thu aupuiin, Guwahati-a Mahatma Gandhi Road aṭanga Raj Bhavan thleng kawng zawh an tum a,mahse police-te chuan kawngzawhte danna te hi lo siamin, police ṭhahnem tak an duty a ni.

Kawngzawhten police-te daidanna siamte paltlang luih an tum chuan police-te hian lo nawr letin, an hruaitu leh worker eng emaw zat an hreng zui a, mahse a hnuah an chhuah leh nghal tih an sawi.

Borah leh Hussain bakah, kawngzawhnaa tel MLA leh party hruaitu ṭhenkhatte chu police-te bus-ah khung khawmin an hruai sawn a, hun eng emaw chen an hreng zui a ni.

Assam police-te chu BJP goonda force ang maia an chet thu Bora chuan a sawi a, hei hi an pawm thei ngai dawn lo tih a sawi bawk. "Nawrh huaihawttu kan worker-te chu an vua a, mahse hetianga an chetna hian min tihlau dawn chuang lo," a ti.

BJP sorkar chuan agency hrang hrang - CID, ED leh state police-te chu eptute beihna atan an hmang niin Bora chuan a sawi bawk.

Police-te an chhuah hnuah Borah leh party hruaitu dang ṭhenkhat chuan governor Jagdish Mukhi hnenah Assam Pradesh Congress Committee (APCC) hmigin memorandum an thehlut leh nghal bawk. Memorandum an thehluhah hian, New Delhi-a All India Congress Committee (AICC) headquarters Delhi police-ten an luhchilh chu mak an tih thu leh, India ram dinhmun chu a ngaihtuahawm hle nia an ngaih thu an sawi. Hetiang bawk hian Guwahati-a Assam Congress Headquarters chu Assam police-te pawhin an luhchilh niin an sawi bawk. Party office compound-ah hian police-te chetdan avangin hmeichhe pahnihin hliam an tuar a, Assam Congress office chhunga police-te chetdan chu an dem takzet thu leh, police-te laka action lak thuai an phut thu memorandum-ah hian a tarlang a ni.