ZCA-in Churachandpur medical college sawn tum duh lo

Manipur-a Zomi Chief Association (ZCA) leh Churachandpur district-a pawl dangte chuan Churachandpur medical college hmun dangah sawn a ni dawn nia report a awm hnuah, union home minister Amit Shah hnenah college hi sawn a nih lohna tura hma lak pui turin an ngen.

Kum 2020, December 27 khan Amit shah chuan Churachandpur-a Mata khuaah medical college sakna tur lungphum hi a phum a ni.

Amit Shah hnena joint memorandum an thehluhah, ZCA chuan kum 2020, September 15 khan state cabinet chuan Churachandpur khaw chhim lam, Mata khaw bula medical college dah hi an lo rel tawh a ni, an ti. College dinna tur atan hian ram acre 23 mamawh a nih laiin, Vungzamuan Valte chuan a ram acre 25 zeta zau a pe a ni, a ti.

Mata khuaa medical college sakna tur hna thawh mek hi buaina awm loa chhunzawm a nih a, hna an thawh zawh thuai theihna tura inrawlh turin Union Minister hi an ngen thu ZCA chuan an tarlang. Hna thawhna tur tender pawh tifel tawhin, construction work pawh Keystone Infra Pvt. Limited hnenah pek a ni tawh a, ram zahve vel zet an lai zo tawh a, campus tur pawh an sa dawn ṭan tih an sawi.

"Ngawrh taka hna thawh a nih mek laiin, mi rinawm tak hnen aṭangin state sorkar chuan Mata khua aṭangin K Monjgan khuaah zawk medical college hi sak a tum niin thu kan dawng a, hei hian min ṭhawng hle a ni," tiin June 11 khan health minister pawhin K Monjgan khuaa medical college sakna tur hmun nia sawi hi a lo tlawh a ni, an ti.