Meghalaya-ah leiminin NH-6 tichhia

Meghalaya-a ruahsur nasa avangin hmun hrang hranga lei a min a, East Jaintia Hills-a Lumshong police station huam chhunga National Highway 6 chu leimin a tichhia.

Leiminin NH-6 a tihchhiat avang hian Mizoram, Tripura leh Assam chhim lama Barak Valley-ten mamawh chawk luh kawngah harsatna an tawh phah thei dawn a ni.

Meghalaya chief minister Conrad K Sangma chuan Ningani khan chhiatna thleng vang hian district hrang hrang deputy commissioner-te meeting a neihpui nghal a, meeting-ah hian minister kaihhruaiin regional committee pali din an rel. Regional committee-te hian district hrang hrang dinhmunte enfiahin, mamawh chawkluhna kawnga harsatna an tawh lohna turin hma an la dawn a ni. Department leh district official-ten thawhhona ṭha an neihna turin an bial chante hi an tlawhkual bawk ang.

CM chuan, " District tante chauh ni lo kan ṭhenawm state-te tan pawh he kawngpui hi a pawimawh avangin motor-te an tlan leh thuai theihna atan a siamṭhat hna rang taka thawh turin ka hrilh a ni," a ti.