Manipur Governor-in Expedition (XPD)2470 Roadtrip vailiam

Manipur state Gover­nor Dr Najma Heptutllah chuan Thawhlehni khan Expedition (XPD) 2470 Roadtrip 2017 a kal turte chu Imphal-ah a vai liam.

Expedition (XPD) 2470 Roadtrip 2017-a kal turte hi hmeichhe team an ni a, Imphal aṭanga hian ni 70 chhungin km 24,000 kalin ram 24 an tlawh dawn a ni.

Team hi Rtn Meenas­khi Aravind-in a ho a, Coimbatore aṭanga kal ṭanin Indian tour chu Imphal, Manipur-ah hian an zo a, an final destination London lam an pan tawh ang.

Flag off function hi Rotary Club of Imphal leh Rotary Club of Polo City Imphal (Rotary International District 3240)-ten Rotary Literary Campaign peng pakhat atana an buatsaih a ni.

Governor Dr Najma Heptullah chuan Rotary Club chuan midangte tan hna ṭha tak an thawk ṭhin tih sawiin, ni 70 chhunga ram 24-a kal kual a, hmeichhe naupangte zirna pek vek an nih theihna tura campaign an nei chu thil ropui tak a ni tiin, Prime Minister Narendra Modi-a scheme, ‘Beti Bachao Beti Padhao’ nen pawh a inzul hle a ni, a ti. Hemi rual hian hmeichhe naupangte hnenah eng ang zirna nge pek tih chu hriatchian a ngai tih a sawi a, "Khawvel ram dangte tlawh a, an khawsak dante va hriat a hun tawh a, midangte hnenah pawh kan chanchin chu hriattir a ngai bawk a ni. Kan culture leh kan history-te hi kan chhuangin kan chhawmnung zel tur a ni. Indian nih hi kan chhuang hle tur a ni", a ti.