AP CM thusawiin ngaihven a hlawh

Tibetan sakhaw pui­thiam, Dalai Lama'n Aruna­chal Pradesh a tlawh chungchang chu China chuan na taka sawiselin, India nena an inlaichinna thlengin a nghawng thei dawn niin a sawi a, hetihlai hian India chuan ramchhung inrelbawlnaah China chu inrawlh lo turin a ti ve thung.

Dalai Lama hian AP a thleng tawh a, state mipui­te lawm a hlawh hle. Dalai Lama chung­changa China leh India inkar boruak ṭha lo awm mek tizual thei zawngin Chief Minister Pema Khandu a ṭawng­chhuak a, hei hian khawvel ngaihven a hlawh hle.

CM Khandu chuan an state chuan China ni loin Tibet a ri niin a sawi a, hei hi China chuan a helh hle rin a ni. China chuan Tibet hi a ram peng pakhatah a chhal a, hei bakah hian Arunachal Pradesh state pawh hi a ram chin nia ngaiin 'southern Tibet' tiin a sawi. Mahse India sorkar Arunachal hi India ram chhung ami ngei, lakhran theih loh a ni, a ti.

Khandu chuan Dalai Lama chu sakhaw thil vang liau liaua an state-a zin anih thu sawiin, Dalai Lama kal kualna chungchangah China chuan India vau turin dikna a nei lo a, ti a. China chuan an ram ṭhenawm a nih loh avangin an tih tur leh tih loh tur hrilh turin dikna a nei lo tiin Khandu chuan a sawi.

Dalai Lama hian Thawh­lehni khan Bomdila a thleng a, mipui tam takin flag nen an lo hmuak a ni. AP-ah hian ni kua a cham ang.