Tripura-in SC thupek zawm dawn

Supreme Court-in Tripura sorkarin zirtirtu 10,323 a lak danah thil fel tawk lo a awm avanga he hna lakna hi hnawl a ni thu a sawi hnuah, Tripura Chief Minister Manik Sarkar chuan SC thupek hi an zawm tur thu a sawi.

Sarkar chuan Supreme Court thutlukna siam dan chu an rin dan lo tak a nih thu a sawi a, hemi rual kumin December thlaa zirtirtu ban turte chungchang pawh an theih anga ngaihtuah a nih tur thu a sawi. CM chuan council of minister chuan zirtirtu ban tura tih chungchang hi ngaihtuahin, SC-in f Right of Children to Free and Compulsory Education, 2009 hmanga a thar la leh tura a tih chu zawm an remti a ni, a ti.

SC hian Tripura state hi hriattirna panga a pek zinga a tarlan angin, April 30 hmain state sorkar chuan employment policy a siam dawn a, zirtirtu lak thar tur chung­changah May 31 hmain advertisement pawh tihchhuah a ni dawn tih Sarkar chuan a sawi.

State sorkar chuan 7th Central Pay Commission hman a nih hnua state sorkar hnathawk leh pensioner-te hlawhbi ennawn turin member pathum awmna Pay and Pension Revision Committee a din bawk. Sarkar chuan panel hotu atan hian chief secretary hlui, state election commi­ssioner ni me G Kameswar Rao chu cabinet-in a pawm tawh tih a sawi. Committee hian ni 45 chhungin sorkarah report a thehlut ang.

Sarkar chuan sorkar chuan a rang thei ang berin sorkar hnathawk leh pensioner-te chu hlawhbi thar pek a duh thu a sawi a, pay panel-in rawtna a thehluh hnuah sorkar chuan payscale thar chu a puang dawn a ni, a ti.

Finance Minister Bhanu Lal Saha chuan budget a pharh ṭumi, 2017-18-a payscale thar hmanna tur hian cheng vaibelchhe 600 dah a nih thu a lo sawi tawh a ni.