Assam : Lui tam zawkin hlauhawm chhinchhiahna pel

Assam-ah ruah nasa taka a sur leh avangin state chhunga lui tam taka tui awm zat chuan hlauhawm chhinchhiahna an pel leh tawh a ni.

Central Water Commission (CWC) bulletin, nimina tihchhuah chuan Nagaon-a Kampur-a Kopili lui tui chuan flood level a pel tawh a, hei bakah hian Brahmaputra, Puthimati, Pagladia, Manas leh Beki luite pawhin hlauhawm chhinchhiahna an pel vek tawh bawk. Barak leh Kushiyara luite pawh hlauhawm chhinchhiahna an thleng tawh.

State chhunga district 32-te chuan ruahsur nasa avangin tuilian an tuar leh a, Inrinni khan Cachar, Dima-Hasao, Goalpara, Hailakandi, Kamrup (M), Karimganj leh South Salmara-ahte hmun eng emaw zatah lei a min bawk a ni.

Tuilian vang hian mi 3,099,762-ten harsatna tawkin, an zinga 1,56,365-te chu sorkarin relief camp 514 a siamah an khawsa mek. Relief camp hrang hranga awmte bakah, tuilian tuartu dangte tan chhawmdawlna sem a ni.

National Disaster Response Force (NDRF), Assam police, Fire leh ES chuan tuilian tuarte chhanchhuah leh ṭanpui hna hi an thawk a, mi 20,983 an hruaichhuak tawh.

Nimin thleng khan Assam-ah hian tun hnaia ruahsur nasa avanga chhiatna thlengah mi 62 an thi tawh a, an zinga a tam zawk chu leimin vanga thi an ni. Tuilian hi revenue circle 118-a thingtlang khaw 4,291-ten an tuar a ni.

Tripura relief camp-ah mi 5,000 chuang awm mek
Tripura-a Agartala suburban area-ah pawh tuilian an tuar mek a, tuilian tuar zinga mi 5,000 chuang chu relief camp 25-ah an awm mek.

Chief minister Dr Manik Saha chuan Inrinni khan Agartala-a relief camp hrang hrangte tlawh kualin, harsatna tawk mekte chu sorkarin a theih angin a pui zel dawn tih a hrilh.

CM Dr Saha chuan, "Hmun ṭhenkhatah chuan tui hi a kam ṭan deuh tawh a ni. Residential area-a cheng, tuilian vanga tangkhangte chhanchhuahna atan lawng hman a ni a, official-te hnenah pawh a ṭul anga rescue team din belh turin ka hrilh a ni," a ti.

Subdivisional magistrate, Sadar, Ashim Saha chuan Howrah lui lian vanga a chhehvel bial chu tuiin a chim vek thu a sawi a, hmun hniam lama chengte chu hruaichhuah an nih thu a sawi. Baldakhal leh South Chandrapur area chu tuilian tuar nasa zual a ni a, inkalpawhna kawngte a chhiat tel avangin mamawh chawkluhna kawngah pawh harsatna an tawh mek a ni.

Meghalaya : Chhiatna thlengah mi 27 thi tawh
Meghalaya-ah kumin April 1 aṭang khan tuilian vangin mi 27 an thi tawh a, chin hriat lohin mi pariat an awm mek bawk.

Kar liam taa ruah nasa tak a sur leh avangin khaw 20-ten harsatna an tawk a, thlai chinna ram hectare 15-a zau chu tuilian hian a chim chhe tawh bawk.

Leimin vanga National Highway-6 a tihchhiat chu ngawrh takin siamṭhat hna thawh mek a ni tih East Jaintia Hills district DC Abhilash Baranwal chuan a sawi. National Highway chhia hian state chhunga district ṭhenkhat bakah, an ṭhenawm state-ten chakkhai an lakna thlengin a nghawng a, hei vang hian motor lian tlan tir an nih leh thuai theihna turin hma an la mek tih an sawi a ni.

National Highway chima June 16-a truck tlaa handyman ruang chu ni hnih hnu, Inrinni khan lakchhuah a ni. State Rescue Team (SRT) of Fire & Emergency Services chuan Inrinni chawhnu dar 12:30 khan handyman ruang hi an lachhuak a, Khliehriat Civil Hospital-ah post-mortem tura lak nghal a ni.