AP-ah Kristianten kawng an zawh

Arunachal Christian Forum (ACF) huaihawtin Inrinni liam ta khan Tawang biak-in sak khapsak a nih chungchangah lungawi lohna lantirin, state chhung hmun hrang hrangah Kristianten kawng an zawh.

Tawang biak-in sak chungchanga buaina chu chinfel a nih thuai loh chuan court lamah zualko an tum thu an sawi.

ACF president Toko Teki chuan, "A hmain sorkar chu kan thil phutte tihlawhtling turin ni 15 hun kan lo pe tawh a, mahse hun tiam chhunga a tihhlawhtlin loh avangin Kristian pawl hrang hrang aiawhte chuan lungawi lohna lantir hi kan rel ta a ni," a ti.

Tawang-a Kristian biak-in sak hi kum 2020, October thla khan pawl pahnih, Indigenous Faith and Cultural Society of Arunachal Pradesh leh Monpa Mimang Tsogpa chuan dan loa sak nia sawia an complaint avangin tihtawp tir a ni. District land revenue and survey officer-in he kohhran pastor lakah hian FIR thehlutin, pastor hi man a ni bawk a, mahse a hnuah bail-a chhuah tir a ni.

Mahse Tawang-a Kristiante chuan biak-in hi kum 1999-ah a ding tawh a, kum 2003-a land allotment an dilna chu department lamin an ngaihsak duh loh avangin kum 2015 aṭang khan biak-in hi an sa ṭha leh niin an sawi thung.