Assam-ah Bawngsa ken vangin mi pathum man

Assam police-te chua Jorhat khuaa Gohain tekela bialah thlai zawrhna bazarah mi pathum chu bawngsa an ken avangin an man a, an mi man zinga pakhat chu kum tling lo a ni.

Police-te chuan industrial training institute saknaa inhlawh­fa te chu hmun danga bawngsa an lei kengin Jorhat-a thlai zawrhna bazarah hian an kal a,an bawngsa ken chu ualau takin an tilang a ni, an ti. Bazar-a awmte chuan bazar huam chhungah hian temple a awm chungin heng mite hian ualau takin bawngsa an khai lang a, zanriah atan an siam dawn tihte an sawi a ni tiin police-ah complaint an thehlut a, an sakhua zah lohna nia ngaiin FIR an thehlut a ni.

Police-ten bawngsa kengtu mi pathum an man zinga pahnih chu court-in ni 14 chhung judi­cial custody-a dah turin a rel a, pahnih chu Jorhat jail-ah dah niin, kum tling lo pakhat erawh chu juvenile home-ah dah a ni.

Mi pathum mante hian an sa ken chu bawngsa a nih thu pawh an sawi tawh a, mahse Animal Husbandry Department lam pawh enfiah tir tho a nih thu police-te chuan an sawi.

Assam-ah hian Assam Cattle Preservation Act, 1950 hnuaiah bawng talh khap a nih thu Kenduguri police station officer in-charge Prasanta Bhuyan chuan a sawi a, an mi mante pawh hi he Act hnuaiah hian thubuai siamsak an ni.