Assam BJP MLA in an party chhuahsan

Assam-a BJP MLA Shi­laditya Dev chuan Pathianni khan BJP aṭanga a ban thu a sawi. 

Shiladitya Dev chuan party chhunga intihhranna a awm vang leh, ngaihsak a nih tawk loh avangin a bang tih a sawi a, party dang zawm a tum lo tih a sawi nghal bawk. Pathiannia a bial, Hojai-a press conference a neihah, Dev chuan a MLA term chu a hman zawh tur thu a sawi a, "BJP-ah hian kum 30 ka awm tawh a, mahse tunah chuan ka awm zel hi a rem tawh lo. Hei vang hian ka zahawmna vawnhim nan pawh ka tel tawh loh a ngai a ni. Min duhsak­tute ka biakrawn hnuah July 14 aṭangin party aṭanga chawlh hi ka tum ta a ni," a ti. Party dang zawm loin, mipuite rawngbawl hna theihtawpa thawh chhunzawm zel a tum tih a sawi. 

Member 126 awmna Assam Assembly-ah BJP hian member 60 a nei a, a thawhpui AGP in MLA 14 leh BPF in MLA 12 an nei a, anni bakah indepenent MLA pakhatin a thlawp bawk. Dev a hma pawhin sawi zui hlawh zawngin thu a lo sawi fo tawh a, kum 2018 khan Assamese leh Bengali inkar boruak tichhe thei zawnga thu a sawi avangin Silchar police station-ah a lakah FIR thehluh a lo ni tawh. Hemi kum vek hian an state-a National Register of Citizens (NCR) kalpui chungchangah a thusawi avangin Court of Chief Judicial Magistrate, Nagaon-ah thubuai siamsak a lo ni tawh bawk a ni.