Assam-ah ramchhunga lei sei ber dawh dawn

Assam state-ah ram chhunga lei sei ber tur dawh a ni thuai dawn. He lei dawh tur hi m 126-a thui niin, Uppaer Assam-a Sivasagar aṭanga river island Majuli kaltlanga state chhung hmun dang kalpawhna tur a ni.

Assam Chief Minister Sarbananda Sonowal chuan lei dawhna tur project tan hian sorkar laipui chuan cheng vaibelchhe 15,000 a sanction a, South Korea company chuan detailed project report (DPR) a siam mek a, kum khat chhungin a siam zo hman dawn niin a sawi.

Sonowal chuan lei dawh tur Sivasagar-a Nitai Pukhuri aṭanga inṭanin, Dhakuakhan-a Teleki Phuta lei a paltlang ang a, heta ṭang hian peng darhin Majuli island-a Kamalabari leh Nemati-te a pawh leh dawn a ni.

Majuli hi khawvela river island lian ber a ni a, Jorhat district hnuaia awm ṭhin a ni a, mahse tun hnai­ah district puitlingah hlankai a ni. Majuli hi CM Sonowal-a constituency a ni a, state chhung hmun lailite nena inkalpawhna turin lei dawh a lo tiam tawh bawk.