Assam : Tuilian tuarte chhanchhuah hna thawhnaah police 2 an thi

Assam-a tuilian tuarte chhanchhuah hna thawhnaah police pahnih chu Pathianni zan khan tuilianin hnawlin an thi.

Assam police-te chuan Pathianni zana Nagaon district-a tuilian tuarte chhanchhuah hna, Kampur police station team-in an thawhnaah sub-inspector Samujjal Kakoti leh constable Rajiv Bordoloi-te chu tuilian hian a hnawl tih an sawi. An ruang hi zawn nghal niin, nimin zing khan State Disaster Response Fund (SDRF) chuan an lachhuak a ni.

Assam-ah hian ruah a sur thar leh avangin district 33-ah tuilian leh leimin vangin harsatna a thlen leh mek a, mi nuai 42 vel a nghawng a ni.

Pathianni khan tuilian leh leimin vangin mi pakua an thi leh a, police pahnihte bakah naupang pathum an tel. April thla hnua ruahsur nasa avanga chhiatna thlenga thi hi mi 71 an tling tawh.

Khaw 5,137 velin tuilian hi an tuar mek a, Barpeta district chuan tuar nasa berin mi nuai 12.76 velin tuilian hi an tuar. Darrang-ah mi nuai 3.94 leh Nagaon-ah mi nuai 3.64-ten harsatna an tawk mek bawk. Tuilian tuarte ṭanpui leh chhanchhuah hna hi state police-te bakah sipai, paramilitary force, national disaster response force (NDRF), state disaster response force (SDRF), emergency leh fire service-ten an thawk mek. Kaziranga National Park pawh tuilian hi an chim leh nasa tawh hle.

Tuilian tuarte tan district hrang hrangah relief camp 744 siam a ni tawh a, heng hmunah hian mi nuai 1.86 chuang an khawsa mek. District 25-ah tuilian hian thlai chinna ram hectare 1,07,370.43 a chim tawh a, ranvulh nuai 29.28 chuang an thi tawh bawk.

Prime minister Narendra Modi chuan chief minister Himanta Biswa Sarma biain, an state dinhmunte a zawt a, harsatna an tawh mekah sorkar laipui chuan a theih anga a puih zel tur thu a hrilh. CM Sarma pawhin tuilian tuar mek, Kamrup district-a Rangia leh, Fatima Convent School leh Kolajal-a relief camp siamte a tlawh tawh bawk.