Meghalaya CM-in NH-6 lei minna hmun a tlawh

Meghalaya chief minister Conrad K Sangma chuan Pathianni khan East Jaintia hills district-a National Highway 6-a lei minna hmun a tlawh.

Lumshong, East Jaintia hills district-a National Highway-a lei min vang hian Assam, Mizoram leh Tripura-te chuan mamawh an chawk luhna kawngah harsatna an tawk mek a ni. Motor an tlan theih loh avangin thuneitute chuan light motor vehicle chin tan an tlanna tur kawng dang, Lumshnong-a Star Cement Premises kaltlangin an ruahman.

CM chuan kawngpuia tangkhang mek, truck driver-te pawh kawmin, sorkar chuan an harsatna tawh mekah a theih anga a puih zel tur thu a sawi. Khuain a zir chuan kawngpui siamṭhat hna pawh ni hnih khatah zawh theih tuma hma an lak mek thu a hrilh bawk. Mahse ruah a la sur chhunzawm reng avangin hna thawh hi a khaihlak leh ṭhin tih a sawi zui bawk a ni.

National Highway 6-a lei min vang hian Assam leh Meghalaya aṭanga motor chhuak, truck 1,000 chuang chu kawngpuiah hian an tang mek a ni. Tangkangte ei tur pe ṭhin tur hian DC pawh an hriattir thu CM chuan a sawi.

Sangma chuan Khielhriat-a DC Office-ah district official-te chu meeting neihpuiin, an district dinhmunte an sawiho a ni. Meeting zawh hnuah chanchinthar lakhawmtute a kawmnaah, Chief Minister chuan union home minister Amit Shah hnenah an state-in harsatna a tawh dan chu a thawn thu te, sorkar laipui aṭanga puihna Rs vbc 300 an dil thute a sawi. Amit Shah hian ruahsur vanga Meghalaya state-a chhiatna thlen dante enfiah turin central team tir an nih tur thu a hmain a lo sawi tawh a ni.

Nimin khan CM hian Garo Hills district-a ruahsurin chhiatna a thlen dante enfiahin a tlawh leh bawk.