Assam-in Death Audit Board din

Assam sorkar chuan an state-a Covid-19 kai zinga thite chu he hri vanga thi an ni ngei em tih finfiahtu tur, member pali awmna Death Audit Board a din. 

Health minister Himanta Biswa Sarma chuan Indian Council of Medical Research (ICMR) guideline zul zuiin Death Audit Board for Covid19 hi din a nih thu a sawi. Board-in a nemnghet hnuah Covid-19 vanga thi an ni tih official-a pawm chauh a ni dawn tih a sawi. 

Assam-a hri kai an pung chak hle a, hri vanga thi pawh an pun belh zel. Nimin thleng khan Covid-19 vanga thi hi mi 36 an tling tawh a ni. Hetih lai hian Covid-19 kai thi zinga ṭhenkhat chu natna benvawn lo nei sa tawhte an ni a, an thihna chhan hi hri vang nge, an natna lo neihsa vang tih chungchangah inhnialna a awm a ni. Hei vang hian state sorkar chuan an thih chhan dik tak tichiangtu turin board hi a din ta a ni. 

Pathianni khan hri kai thar mi 735 awm belh lehin, an zinga mi 400 chu Guwahati khawpuia mi an ni. Ni kua chhungin Guwahati khawpui bikah hri kai hmuh thar hi mi 4,624 an tling hman a ni. State puma hri kai hmuh chhuah tawh hi mi 16,806 an tling tawh a, heng zinga 10,894 chu enkawl dam ni tawhin, recovery rate hi 64.82% a ni.