Dalai Lama-a'n Tawang a thleng

Tibetan sakhaw puithiam, Dalai Lama chuan Aruanchal-a Tawang chu kar kalta Zirtawpni khan a thleng ta. Tawang hi India leh China border kianga awm a ni a, China chuan Dalai Lama-a'n Tawang a tlawh ni hian na takin a sawisel.

Dalai Lama hian Dirang aṭangin Tawang hi a pan a, darkar sarih hnuah a tum ram hi a thleng thei a ni. Arunachal Pradesh Chief Minister Pema Khandu chuan a hnung zuiin, mipuiten an lo lawm hle a, hmun hrang hrangah Tibet leh India flag-te tar a ni a, kawngpuite chu rawng hmanga cheimawi niin, pangpar mawi tak tak nen an lo hmauk a ni. Amah lo lawm hian Ladakh leh Bhutan aṭang tein mi eng emaw zat an kal a, venhimna khauh taka kalpui a ni bawk.

Buddhist sakhaw puithiam Dalai Lama hian ram chhunga monastery lian ber Tawang monastery a tlawh a, hei hi khawvelah pawh pahnihna hauh phak a ni. Tibet-a Potala Palace chu khawvela monastery lian ber a ni. Dalai Lama hian hun eng emaw chen chu Tawang monastery-ah hian hun a hmang dawn a ni. Kum 1983 khan a vawi khatna atan Arunachal hi a tlawh a, kum 2009 khan tlawh lehin, kum riat hnu April 4 khan AP hi a thleng leh a ni.

Dalai Lama chuan Arunachal Pardesh nen chuan a mimal taka inlaichinna ṭha bik an neih thu a sawi. India ram a tlawh theih nan sorkar laipui remtihna a hmu chu lawmawm a tih thu sawiin, Arunachal a tlawh thei chu a lawm tak zet tih a sawi. Kum 1959-a India ram a luh khan Arunachal paltlangin a kal tih a sawi a, a tan chuan hmun pawimawh tak a ni reng tawh dawn tih a sawi. Ram mipuite dawnsawn dan avang leh, duhsakna tam tak a dawn te avangin a lawm hle tih a sawi bawk.

Lama chuan, Tibet chuan mahnia ro in rel hrang turin indepen­dence a sual lo a, China bung pakhat a ni a, mipuite pawhin People’s Republic of China hnuaia awm hi an duh a ni, a ti. Tibet chu hma­sawnna kawngah sang lo mah se sakhuana lamah chuan a sang hle a ni, a ti bawk. Hetih lai hian China sorkar beih nana India-in a hmang ṭangkai anga sawi chu phain, hmasanga India mite ngaihdan leh a rindan te auchhuahpuitu a nih zawk thu a sawi. India hian China beih nan hian a hmang ngai lo a, remna leh muanna a awm theih nana a beih zawk thu a sawi.

Hetih lai hian China chuan Dalai Lama-a'n a tlawh hi na takin a sawisel a, Tawang chu Tibet ram bung pakhat a nih thu a sawi. China hian kum 1950 khan Tibet hi a run a, a awpzui ta a ni. India ramah hian Tibetan mi 100,000 vel an cheng anga ngaih a ni.