Assam-in fa pahnih aia tam nei ; Sorkar hna pek a remti dawn lo

Assam sorkar chuan 'draft population policy' a duan thar chu Pathianni khan a puang a, he dan hnuaiah hian fa pahnih aia tam neite chu sorkar hna pek an ni ve dawn lo.

Health Minister Hi­manta Biswa Sarma chuan, policy thar hnuaiah hian fa pahnih aia tam neite chuan sorkar hna an thawh ve a rem dawn lo a, hetih lai hian hmeichhia te chu university thleng a thlawnin lehkha an zir thei dawn a ni, a ti. Sorkar hnathawk, policy thar hman a nih hnua fa neite chuan pahnih aia tam an neih a thiang dawn lo tih sawiin, hei hi ngaihpawimawh a nih tur thu a sawi. Hemi rual hian employment generation scheme hmangin sorkar aṭanga hamṭhatna awm theite ngaihtuah sak an ni ang, a ti. Hei hi panchayat, municipal leh autonomous council-ah pawh hman vek tur a nih thu a sawi.

Minister Sarma chuan, policy-in a tum chu nau­pangte hnena a thlawna zirna pek te, hmeichhe tan bik a thlawna university thlenga an zir theihna tur te a nih thu a sawi. Hei hian school fee, transportation, hostel thlengin a huam dawn a ni. Hei hian a bikin hmeichhiaten zirna kawnga phurna leh hmasawnna an neih theih nana tih a ni, a ti. Heng bakah hian hmeichhia kum 18 tlin hma leh mipa kum 21 tlin hmaa nupui pasala innei tihtlemna tur te, hmeichhia leh kum naupang zawk ten diriam an tawh lohna turte pawh ruahman a ni, a ti.

Policy hi a taka hman a nih hmain, July thla tawp thleng mipui ngaihdan lak a ni dawn a, Assembly House-ah sawiho a nih leh ang. Hei bakah hian hmeichhe tan sorkar hna lakah 50% hauhsak te, election-a hmeichhe tan seat 50% hauhsak rawtna te a awm thu, Minister Biswa Sarma chuan sawi bawk. Assam-ah hian kum 2011 chhiarpui khan mihring vaibelchhe 3.12 an awm a, kum 2001 chhiarpuia mihring awm zat aiin vaibelchhe khatin an pung a ni.