AP MP-in Lok Sabha-ah China chungchang sawichhuak

Arunachal Pradesh MP Ninong Ering chuan Dalai Lama-a'n Tawang a tlawh chungchanga China-in India a khak dan chu kar kalta Zirtawpni khan Lok Sabha-ah a sawichhuak.

Congress MP Ninong Ering chuan, hmarchhak chu ram dangte nena inri a nih avangin a him tawk lo tih a sawi a, China chuan Arunachal ngei pawh a ramah a chhiar a ni, a ti. Hemi chungchangah hian sorkar laipuiin enge a tih ang a, state sorkarin engtiangin nge hma a lak ve ang tih ngaihtuah a ngai a ni, a ti. Ram danpui 'Sixth Schedule' chu siamṭhat a hun tawh tih a sawiin hmarchhak miten endawng an tawk ṭhin chu tihtawp a hun tawh tih a sawi.

CPM MP Jitendra Chou­dhury pawhin, Sixth schedule siamṭhat a hun tawh thu sawiin, a bik takin Manipur, Aruna­chal Pradesh leh Assam-te chuan hei hi hun rei tak chhung an nghak tawh a ni, a ti. Ram danpui siamṭhatna tur hi kum 2015 khan put luh a nih tawh thu sawiin, tun thlengin siamṭhat a la ni lo tih a sawi. Hei bakah hian Assam, Meghalaya, Tripura leh Mizoram-a tribal chengte ram danpuiin a humhalh bik dante a tarlang bawk a ni.