Dalai Lama-a'n a vawikhat nan zirtirna pe

Tibetan sakhaw puithiam Dalai Lama chuan kar kalta Zirtawpni khan Aruanchal Pradesh-a Tawang district a thleng a, mipuite zirtirna a pek hmasak bera VIP leh VVIP-te chu BPL chungkua leh senior citizen-te an ni.

Dalai Lama-a'n Tawang a thlen hnua sakhaw thila inzirna a neih hmasak berah hian Tawang district administration, MLA, zirtirtute leh BPL chhungkuaa senior citizen-te chu mipawimawh (VIP & VVIP) an ni a, mi 500 vel chu Dalai Lama-a ṭhutna bul hnaiah ṭhut tir an ni. Inkhawm buatsaihah hian tel an ṭhahnem hle a, kum upa tak tak thlengin tel an tam hle a ni. Inkhawma tel ve zinga mi, Indo-China border kianga cheng kum 82-a upa Sitim chuan Dalai Lama a taka a hmu thei chu a hun tawna ropui ber a nih thu a sawi. Dawa Choton (84) pawhin a ṭawngṭai ṭhinna chu chhana a awm tak thu sawiin, Dalai Lama-a zirtirna dawng zinga a tel thei chu a lawmzia hahipin a sawi. Inkhawm buatsaihah hian mi tam takin Dalai Lama an ngaihsanna an lantir a ni. Buddhist sakhaw puithiam Dalai Lama hian ram chhunga monastery lian ber Tawang monastery a tlawh a, he hmunah hian hun eng emaw chen hun a hmang dawn a ni. A cham chhung hian sakhaw lama inzirtirna hun buatsaih ṭhin a ni dawn a, a chhim turin mi tam tak an pungkhawm a ni.

Hetih lai hian Rashtriya Swayam­sevak Sangh (RSS) party chuan Dalai Lama hi India rama civil mite chawimawina sang 'Bharat Ratna' hlan an duh thu an lo sawi ve mek bawk. Arunachal RSS thupuangtu Rajiv Tuli chuan, 'Bharat Ratna' hlan a nih theih nan hian campaign an nei mek tih sawiin, signature 5,000 chuang an lakhawm tawh niin a sawi. Signature 25,000 an lakkhawm hunah Prime Minister Narendra Modi hnenah ngenna an thlen dawn tih a sawi. BJP MP leh Himachal Pradesh chief minister hlui ni bawk Shanta Kumar chuan Dalai Lam hian civil chawimawina sang hi pek a phu thu a lo sawi tawh bawk.