Manipur sorkarin People’s Day hmang ṭhin dawn

Manipur Chief Mi­nis­ter N. Biren Singh chuan mipuiten sorkar mi pawimawhte awlsam zawka an dawr theihna turin thla tin 'People’s Day' (Meeyamgi Numit) hman ṭhin a nih tur thu a puang.

People’s Day hi thla tin ni 15-naah hman ṭhin a ni dawn tih Biren Singh chuan sawiin, hemi ni hian mipuite chuan Chief Minister, Minister, Commissioner, Secretary, Deputy Commissioner leh Superintendent of Police-te an dawr thei ṭhin dawn a ni, a ti. Biren chuan a kaihhruai sorkar hmalak tawh te tarlangin, ni 139 chhung zet United Naga Council (UNC)-te'n National Higway an danchah tawh chu tihtawp a ni a, Churachandpur buaina chinfel a ni tawh bakah, National Highway-37 chu dan pangngaia hawn a nih tawh thu a sawi.

Chief minister chuan Joint Action Committee Against Anti Tribal Bills (JAC-AATB)-te chu sorkarin inbiakna neihpui a tum tih sawiin, harsatna awm te chu sutkian thuai a beisei tih a sawi. JAC-AATB-te hian kum 2015-a Congress kaihhruai sorkarin anti-triball bill pathum a pass chu tribal-te hamṭhatna tihbo tumnaah ngaiin nasa takin an dodal a ni. Hill district head­quarters tinah women mar­ket sak tum a nih thu sawiin, hei hi Prime Minis­ter Narendra Modi-a kaihhruai sorkar laipui pawhin a pawmpui tawh bakah, he project atan hian sum pawh sorkar laipuiin a pekchhuah tawh thu Biren chuan a sawi bawk.

CM Biren chuan Council of Higher Secon­dary Education Manipur (COHSEM) hnuaia Class XII Physics question putru chu pawi a tih thu sawiin, chhui mek a nih thu a sawi bawk.