Central Team-in Assam an tlawh dawn

Assam-a tuilianin chhiatna hrang hrang a thlen dante a hmuna enfiah turin central team-in an tlawh dawn tih chief minister Himanta Biswa Sarma chuan a sawi.

Chief Minister chuan Thawhṭannia union home minister Amit Shah nena an inbiak ṭumin, Shah chuan central team an tirh thu hi a lo hrilh tih a sawi a ni.

Assam-a tuilianten ziaawm lam an pan ṭan laiin, kar liam ta aṭang khan ruah nasa taka a sur leh avangin tui hi an lian thar leh a, state chhung lui lian zualte chuan hlauhawm chhinchhiahna an pel hlawm a ni. District 36 zinga district 32-a cheng mi nuai 47 chuang chuan tuilian vang hian harsatna an tawk mek a ni.

Thawhṭanni zing khan Amit Shah hian CM Sarma biain, an state dinhmunte hi a zawt a, chhiatna thlen dante enfiah tura central team tirh a nih tur thu hi a sawi a ni. Kar liam ta Inrinni khan prime minister Narendra Modi chuan thil awmdan te zawtin CM hi a lo be tawh bawk.

Assembly-a leader of opposition Debabrata Saikia chuan kum li liam ta aṭanga an state-a tuilianin chhiatna a thlen hrang hrang tuarte chhawmdawlna tur leh, thil a tihchhiatte siamṭhatna turin Prime Minister hnenah central package, Rs vbc 20,000 tal pe turin a ngen. Assam-a tuilian leh chhiatna dang thlen chu ram pum huapa chhiatna, national calamity-a puang turin sorkar laipui a ngen bawk a ni.

Sarma chuan tuilian leh leimin avanga Jowai-Badarpur kawngpui chhia chu motor tlan theihna tura siamṭhat thuai a nih theihna turin Meghalaya chief minister Conrad K Sangma nen pawh an inbiak thu a sawi.

Thawhṭanni khan Chief Minister hian deputy commissioner-te chu meeting neihpuiin, tuilian tuarte chhawmdawl dan tur leh, relief camp hrang hranga awm mekte hnena ṭanpuina sem dan turte a sawipui. DC-te hnenah an bial huam chhunga tuilian tuarte ṭanpui leh chhanchhuah hna thawk tura NDRF leh SDRF-te tirh an nih bakah, a ṭul a nih chuan Indian Army pawh koh theih an nih thu a hrilh.