Meghalaya CM-in lei minna hmun a tlawh

Meghalaya chief minister Conrad K Sangma chuan Thawhṭanni khan East Khasi Hills-a Mawsynram block hnuaia lei minna hmun hrang hrangte a tlawh a, tun hnaia lei min vanga nunna chan chhungte hnenah ṭanpuina a hlan bawk.

Kumin April 1 aṭang khan Meghalaya-ah hian tuilian leh leimin vanga chhiatna thlenga mi 34 in nunna an chan tawh a ni.

Chief Minister hian Dangar leh Mawpen-a lei minna hmunte a en kual bakah, lei min avanga a nupui leh fate pali chan, Sanborlang Marak chhungte a tlawh bawk. Marak hi hliam a tuar avangin Shillong damdawi-inah enkawl mek a ni a, CM hian a chhungte hnenah hian ṭanpuina Rs nuai 20 a hlan a ni.

Kenmynsaw khuaah CM hian lei min vanga nu leh pa chan, unau naupang pathumte tlawh bawkin, ṭanpuina sum a pe bawk.

East Jaintia Hills district-a Sonapur Tunnel-a leimin, Pathiannia an thenfai chu ruah a sur chhunzawm zel avangin Thawhṭanni khan leimin tharin a hnawh leh. District thuneitute chuan ṭul bik thilah lo chuan he kawng hi zawh rih lo turin mipuite an ngen a, hemi rual hian Barak Valley leh an ṭhenawm state-te tana nitin mamawh phurtu motor-te chu ngaih pawimawh an ni dawn tih an sawi.