Abhishek Banerjee-a'n Tripura CM remote-controlled CM tiin vuah

All India Trinamool Congress general secretary Abhishek Banerjee chuan Tripura chief minister Dr Manik Saha chu na taka sawiselin, 'remote controlled chief minister' tiin a vuah.

Agartala-a hun a hmanah, Banerjee chuan, "CM Dr Manik Saha chu ama field leh society-ah chuan mi zahawm tak a ni a, mahse hei hian Tripura dinhmun ṭha lo tak chu a thlak danglam thei dawn tihna a ni lo. Dik tak chuan Chief Minister thuneihna nei lo, India khawpui lam aṭanga a boss-ten remote control hmanga an thunun mai a ni," a ti.

Tripura-a Assembly bial palia by-election neih turah party hrang hrangte hi an campaign ngawrh hle a, inthlan lo awm turah hian CM Saha pawh hi a ding dawn a ni.

Dr Saha chuan a party enkawl zo loah puhin, TMC hruaitu chuan, "Tharum thawhna a thleng lo ang tiin a sawi a, mahse Agartala, Surma leh inthlan neihna tur hmun dangahte chhun khaw en laiin Trinamool Congress thlawptute leh candidate-te ngei pawh beih an ni," tiin a sawi.

By-election lo awm turah an party candidate-te chu vote tura ngenin, Banerjee chuan mipuiten eptu party hrang hrangah an vote an tihdarh chuan BJP bawk chuan an chak phah leh dawn a ni, a ti. Hei vang hian Trinamool Congress candidate-te chu vote turin a sawm.