Manipur sorkar leh JAC-te inbe leh

Manipur sorkar leh Joint Action Committee Against Anti-Tribal Bills (JAC-AATB) aiawhte chuan Thawhṭanni khan Imphal-ah inbiakna an nei leh a, inremna siam a la ni lo.

Inbiakna hi Chief Mi­nis­ter Secretariat-ah dar­kar thum zet neih a ni a, inremna erawh siam a la ni lo. Hei bakah hian inbiak leh hun tur pawh tarlan a ni lo. JAC-AATB-te chuan dan hmangin tribal-te chenna chu humhim an duh thu an sawi a, MLR leh LR Act of 1960 hmangin hliam tuar leh martar-te chu zángnadawmna pek an phut a ni. April 7 khan inbiakna hi neih a lo ni tawh a, hemi ṭum pawh hian inremna siam a ni lo.

August 31, 2015 khan Congress kaihhruai sorkar chuan bill pathum - The Protection of Manipur People Bill, 2015, The Manipur Land Revenue and Land Reforms (Seventh Amendment) Bill, 2015 leh The Manipur Shops and Establishments (Second Amendment) Bill, 2015 a pass a, hei hi tribal-te chuan nasa takin an dodal a ni. BJP kaihhruai ṭangrual sorkar a din hnuah, Chief Minister Biren Singh-a chuan JAC-AATB-te hi inbiakna neihpui an nih tur thu a puang a, ṭum hnih inbiakna hi neih a ni tawh. Mahse tun thlengin inremna hi a la awm thei lo a ni.

Tribal-te'n bill duh lohna lantira sorkar an nawrnaah tribal mi pakua zetin nunna an chan tawh a, heng zinga mi pariatte ruang chu Churachandpur District Hospital-ah dah an la ni. Tribal-te chuan an thil phut a hlawhtlin hma chuan martar-te ruang hi phum an tum loh thu an sawi a, bill hmang hian rahbeh leh nek chepin an awm dawn niin an sawi. Bill hi pass ni tawh mah se President Pranab Mukherjee chuan a pawmpui lo a, dan anga hman theih a la ni lo a, dan hremite kaihhruaina hnuiah duan ṭhat leh a ni bawk.

Inbiaknaah hian JAC-AATB aiawh mi 13 an tel a, sorkar aiawhin Chief Minister leh Cabinet minister-te bakah Chief Secretary Oinam Nabakishore Singh leh DGP LM Khaute-te an tel a ni.