Arunachal sorkar chungah Dalai Lama a lawm

Tibetan sakhaw puithiam Dalai Lama chuan Thawhṭanni khan Arunachal-a a cham chhunga a thuchah hnuhnung a sawi a, Arunchal sorkarin a lo dawnsawn ṭhat avangin lawmthu a sawi.

Dalai Lama chuan Chief Minis­ter Pema Khandu-a kaihhruai sorkar chungah lawmthu sawiin, state mipuite chungah lawmthu a sawi bawk. Thawhṭanni khan Yid GaChosin monastery-ah a thuchah hnuhnung a sawi a, chhimtu an ṭhahnem hle. Lama chuan hmarchhak hmun hrang hrang a tlawh thei chu lawmawm a tih thu sawiin, an lo dawnsawn ṭhin dan chu ropui a tih thu a sawi. A bik takin a thusawi ngaithla tura hmun hla tak tak aṭanga pantute inpekna chu ropui a tih thu sawiin, duhsakna a hlan.

Dalai Lama hian kar kalta Zirtawpni khan Arunachal-a Tawang district a thleng a, he hmunah hian ni li a cham a ni. A cham chhung hian sakhaw thilah zirtirna a pe ṭhin a, kum upa lam thlengin an ngaihlu hle. Remna leh muanna duhtu a ni a, a auhla ber pakhat pawh a ni. Lama chuan sakhaw hmingchhala mi nunna lak chu a pawm ve loh thu a sawi a, inrem taka khawvel hi a awm a duh ber tih a sawi. Buddhist-te chuan Karma an ring a, an sakhaw rindan pawm ve lotute chu an sakhaw zawm tura a beisei loh thu a sawi bawk.

A cham chhunga a thuchah hnuhnung ber chu Rinzin Dhondup-ah a sawi a, Twang-a Lord Buddha lim a tlawh bakah Guru Padhmasambhava lim te a tlawh a, Gyalwa Jamba (Kuber) lim dinna tur lung­phum a phum bawk. A lehkhabu ziah ‘Ocean and Blue Mountains’ chu CM Pema Khandu-a'n a tlang­zarh a, hei bakah hian Tibet aṭanga India rama a vahvai dan a ziahna ‘Crossing of the Frontiers’ chu tlangzarh a ni tawh bawk.

Dalai Lama hian hmarchhak state Assam leh Arunachal-te hi ni eng emaw zat chamin a tlawh a, Assam-a hun eng emaw chen hun a hman hnuah Arunachal a pan leh a ni. AP-a a cham chhung hian China leh India inrinna kianga awm Tawang a tlawh a, hetah hian ni li chhung hun a hmang a ni. Tawang a tlawh hi China chuan a helh hle a, na takin vawi eng emaw zat a sawisel a ni.