Meghalaya sorkar chuan sorkar laipuiin Good Friday ni-a Digital India Day hman a tum chu a duh loh thu a sawi. 
Congress kaihhruai sorkar chuan, Kristian-te ni pawimawha Digital India Day hmang tura sorkar laipui thutlukna siam chu a pawm ve thei loh thu a sawi. Chief Minister Mukul Sangma chuan central-a BJP kaihhruai NDA sorkar thutlukna hi na takin a sawisel a, ram danpuiin sakhaw hrang hrang zuitute zalenna a pek palzutna a ni, a ti. Kristian ni pawimawha sorkar hnathawkte leh mipuite Digital India Day lawm tura tih chu thil dik lo a ni a, state sorkar chuan a lawmna hi a buatsaih dawn lo a ni tih a sawi. Sorkar laipui chuan hemi chungchangah hian state hrang hrangte chu a biak kual thu sawiin, Meghalaya sorkar chuan a lawm ve theih loh tur thuin a chhang a ni, a ti. 
Prime Minister Narendra Modi-a kaihhruai sorkar chuan Kristiante hun pawimawh dang, December 25 chu Good Governance Day-ah a lo puang tawh bawk a, a thiltih dan chu an hrethiam lo takzet niin CM chuan a sawi. Meghalay sorkar chuan Digital India Day hi April 14-ah lawm turin thutlukna siam tih sawiin, Kristian tam zawk ten hun thawl zawk leh hlim taka Good Friaday an hman theih an duh tih a sawi. Hemi chungchang hi Union cabinet secretary-ah ziaka an lo thlen tawh thu sawin, Prime Minister hnenah pawh lehkha a thawn dawn tih sawiin, state mipuite leh hmarchhak state-a Kristian-te aiawhin ngenna a thlen tur thu a sawi bawk. 
Meghalaya-ah hian mihring cheng zawng zawng aṭanga 75% chu Kristian an ni a, hmarchhak state dang Nagaland (88%) leh Mizoram (87%)-te chu Kristian tamna state an ni bawk.