Dalai Lama vangin ramri buaina a chhuak thar leh dawn : China

China chuan Tibetan sakhaw puithiam Dalai Lama-a'n Arunachal Pradesh a tlawh chu a dem thu Nilaini khan a sawi leh a, hei hian ramri chungchanga buaina awm ṭhin pawh a chawk tho thar leh dawn niin a sawi.

Chinese foreign ministry chuan, Beijing chuan Dalai Lama-a'n AP-a tlawh hi a pawmzam mai dawn lo a, a ram himna turin hma a la dawn a ni, a ti. Chinese foreign ministry thupuangtu Lu Kang chuan, Tibetan sakhaw puithiam Dalai Lama chet dan hi sakhuana pel thil a ni a, pawmzam mai theih a ni lo, a ti. China chuan ramri depa awm Tawang tlawh hi a remti lo tih sawiin, he hmuna Dalai Lama-a ni eng emaw zat a cham hi hriatthiam theih a ni lo a, chhan let a ni ang, a ti. Ram himna turin hma lak zel a ni dawn tih a sawi.

Arunachal-a Tawang hi China leh India chuan an ram chinah an ngai ve ve a, vawi eng emaw zat ram inchuhin an lo innghirngho tawh a ni. Dalai Lama hnung zuia Arunachal Pradesh Chief Minister Pema Khandu-a'n Tawang a tlawh ṭumin, an state chuan China a ri loh thu leh, Tibet an ri zawk thu a sawi. Hei hi China chuan a helh hle a, a ram bung pakhata a chhiar Tibet chu a thuhnuaia awm a nih avangin a ram a nih thu a sawi. Hei bakah hian Tawang chu Southern Tibet ram bung pakhat niin a chhal bawk.

Chinese foreign ministry thupuangtu Lu Kang chuan, Dalai Lama-a'n China-India border chungchanga buaina a chawk chhuak thei tih hre chunga Tawang a tlawh hi China chuan a pawmzam mai dawn lo a ni, a ti. China chuan a kal hma aṭang tawhin thuchhuah a siam tih sawiin, palzut a ni chu a hrethiam lo tak zet a, hei hian ramri chungchanga ram pahnihte inkara buaina lo awm tawh ṭhin chu a chawkchhuak thar leh ngei dawn niin a sawi. Hei bakah hian Dalai Lama chuan Tibet chungchang a sawinaah China sorkar a bei niin a sawi bawk.

Nilaini khan China-a nitin chanchinbu chhuak pakhat China Daily chuan, Arunachal mipuite chu India sorkar enkawlna hnuaiah an hlim lo nia tarlangin, China sorkar thuhnuaia awm an duh niin a tarlang. India-in Southern Tibet ram bung pakhar Arunachal a awp chu dankalh niin a sawi.

Kum 20 chuang zet chu ram pahnihte hi ramri chungchangah an buai tawh a, tun thlengin inremna siam a la ni lo. Ramri buai Line of Actual Control zau zawng hi km 3,488 zeta zau a ni. China chuan Arunachal Pradesh chu Southern Tibet huam chhunga awm a ni a ti a, India pawhin kum 1962 aṭanga a awp Aksai area chu a ram huam chhunga awm niin a chhal a ni.