Assam tuilianin zual lam a la pan zel ; Mi 7 thih belh leh, nuai 55 chuangin harsatna tawk mek

Assam tuilian chuan zual lam a pan zel a, district 32 chhunga mi nuai 55-te chuan harsatna lian tak tawk mekin, Thawhlehni khan tuilian vangin mi pasarih an thih belh leh bawk niin official-te chuan an sawi. Tuilian leh leimin vanga thi hi mi 88 an tling tawh.

Brahmaputra leh Barak Valley-ah lui liante bakah an peng hrang hrangte pawh an la lian vek a ni.

Chief minister Himanta Biswa Sarma chuan tuilian tuar mek Nalbari leh Kamrup district-a relief camp-te a tlawhnaah, tuilian tuarte chhawmdawlna tur chu puan thuai a ni dawn tih a sawi. "Kan sorkar chuan tuilian vanga an ran vulhlai leh bungraw dang chanten an thil chante an report-na tur portal a hawng thuai dawn a ni. Tuilian tuarte chhawmdawlna pawh puan thuai a ni ang," a ti.

Karimganj leh Cachar-te chuan Barak leh Kushiyara tuilian an la tuar mek a ni.

Cachar-a thingtlang khaw 506-a mi nuai 2.16-te chuan tuilian hi an tuar a, Karimganj-a khaw 454-a mi nuai 1.47 chuangte pawh a nghawng mek tih official-te chuan an sawi.

Silchar-a area ṭhahnem takte chu tuiin a chim a, tuilian tuar mi 425 te chu chhanchhuah ni tawhin mi 10,468-te chu relief camp 57-ah an awm mek a ni. Kaziranga National Park-a camp 233 zinga 42-te chu tuilian hian a chim tawh a, ramsa pariat an thi tawh bawk a ni.

Tuilianin zual lam a pan avangin harsatna tawkte chhanchhuah leh ṭanpui hna thawk turin sorkar laipui chuan Thawhlehni khan National Disaster Response Force (NDRF) team pali chu Bhubaneswar aṭangin Silchar-ah a tirh belh leh.