Manipur : JAC-te'n district pek an phût

Manipur sorkarin anti-tribal bill pathum a pass duh lo tribal pawl hrang hrang inzawmkhawm - Joint Action Committee Against Anti-Tribal Bills (JAC-AATB)-te chuan Churachandpur district aṭanga inlak hran a, Lamka district pek an phût thu an sawi.

JAC-AATB-te chuan kar kalta Inrinni khan thuchhuah siamin, Churachandpur aṭanga indan a, inrelbawlna felfai zawk a awm theihna turin Lamka district thar din an duh thu an sawi a ni. Hetih rual hian district thar pek chu an duh ber a nih loh thu an sawi a, tribal martar-te dikna chanvo humhalh sak chu an duh ber a nih thu an sawi. Anti-tribal bill duh lohna lantira nunna chan ta mi pakua te chu hnam tana martar an nih thu sawiin, an chungah dik taka rorel an phût thu an sawi. Martar mi pakua zinga mi pariatte ruang chu vawn ṭhat a la nih reng thu sawiin, BJP kaihhruai sorkar thar chu heng mite dikna chanvo ngaihpawimawh sak tura an phût thu an sawi a ni.

Chief Minister Biren Singh-a kaihhruai sorkar chuan JAC-AATB-te hi ṭum hnih inbiakna a lo neihpui tawh a, inremna erawh siam a la ni lo. Tribal pawl hian April 7 khan sorkar hnenah an thil phût hrang hrangte an lo thlen tawh a ni. An thil phût zingah hian - tribal-te himna ngaihpawimawh te, Lamka District din te, Manipur Land Revenue & Land Reforms (MLR&LR) Act, 1960 hman leh te, tribal martar-te dikna chanvo humhalh te leh Tribal Unity Day (August 31) chu State Holiday-a puan te a tel. JAC-AATB-te hmalakna hi Mizo People Convention, United Zou Organization, Simte Tribe Council, Tedim Chin Union leh Young Paite Association-te'n an thlawp a, April 2 khan Chief Minister N. Biren Singh hnenah memmorundum an lo thehlut ve tawh bawk.

August 31, 2015 khan Congress kaihhruai sorkar chuan bill pathum - The Protection of Manipur People Bill, 2015, The Manipur Land Revenue and Land Reforms (Seventh Amendment) Bill, 2015 leh The Manipur Shops and Establishments (Second Amendment) Bill, 2015-te chu a lo pass tawh a, hei hi tribal-te chuan nasa takin an dodal a, an dikna leh chanvo rahbeh sak tumna a nih thu an sawi. Bill duh lohna lantir hian vawi eng emaw zat nawrh an lo huaihawt tawh a, bill hi sût leh an phût a ni. Congress kaihhruai sorkar nen inremna an siam mai thei lo a, BJP kaihhruai sorkar chuan JAC-AATB-te hi inremna siampui tumin hma a la mek a ni. Inbiakna hi neih chhunzawm leh tura ruahman a ni a, inremna siam tur erawh chuan an thil phût hi sorkarin a pawmsak a ngai dawn niin a lang.