Sikkim-ah rorellai party-in hnehna chang

Sikkim-a rorellai Sikkim Democratic Front (SDF) chuan Upper Burtuk assembly by-election neih zawh takah hnehna an chang. Result hi kar kal ta Inrinni khan puan a ni a, SDF candidate Dilli Ram Thapa chuan amah hnaih bertu BJP candidate Suresh Khanal Sharma chu vote 8,000 chuangin a hneh a ni.

Election Commission-in a tarlan dan chuan, Ram Thapa hian vote 8,406 a hmu a, amah hnaih bertu hian vote 374 chauh a hmu phak a, Congress candidate Sumitra Rai chuan vote 98 chauh a hmu ve bawk. Independent candidate panga te vote hmuh belhkhawm chu 449 a ni. Upper Burtuk hi Prem Singh Tamang bial a ni a, disqualify a nih avangin by-election hi neih a ni a, he bialah hian vote nei mi 9,427 an awm a, April 12 khan vote thlak a ni.