Meghalaya-a tuilian leh leimin avanga hun eng emaw chen Assam - Tripura inkalpawhna kawngpui chhiate chu siamṭhain, lirtheite pawh dan pangngaiin an tlan leh thei ta. 
Nitin mamawh, petroleum product leh eirawngbawlna gas phurte chuan Tripura an lut ṭan leh thei tawh tih principal secretary Tripura Transport Department L Darlong chuan a sawi. 
"June 20 chawhnu lamah, traffic chu kalphung pangngaiin a tlan leh thei tawh a ni. LPG bullet, petrol leh diesel phur lirtheite chuan vawiin khan Churaibari check-post an lo thleng a ni. Lirthei ṭhenkhat chu nimin khan an rawn lut a. Khua hi a pangngai chhoh chuan khaihlak a awm kan ring tawh lo a ni," tiin Darlong chuan nimin khan a sawi. 
Ruahsur nasa vanga leimin vangin kalkawng pawimawh National Highway-6 a tihchhiat avangin Tripura hi tlawh pawh theih lohin hun eng emaw chen a awm hman a ni. Mahse Meghalaya sorkar leh National Highways Authority of India (NHAI)-ten theihtawp chhuahin kawngpui siamṭhat hna hi an thawk a, ni reilote hnuah kawngpui pawimawhte chu an siamṭha leh nghal a ni. 
Chief minister Manik Saha chuan sorkar laipui hnenah Bangladesh nena an inkalpawhna kawng chu bungraw phurhluh lailawkna atana hman a nih theihnan ziakin ngenna pawh a thlen hman bawk a ni.