Nagaland-a hri kai zingah sipai 15 tel

Nagaland-a Covid-19 kai hmuh chhuah tawh chu mi 355 an tling tawh a, an zinga 148 chu enkawl dam an ni tawh thung. Hri kai mek hi mi 207 an awm. 

Health minister S Pangnyu Phom chuan nimin khan hri kai hmuh chhuah thar mi pariat an awm tih sawiin, an zinga panga chu Kohima quarantine centre-a awm niin, Dimapur quarantine centre-a mi pathum an tel bawk.

Nagaland-a hri kai hmuh tawh zingah hian Kohima-a Jakhama army camp-a awm, sipai 15 an tel. Heng sipaite hi chawlh laa haw, tun hnaia an hna zawm lehte an ni. June 23 khan sipai pathumin hri hi an kai tih hriat a ni a, June 24-ah mi dang 12 in an kai tih hmuh leh a ni. Army official-te chuan sipai hri kaite hi Jakhama Army Hospital-ah dah an ni. 

Nagaland State Nodal Officer, Dr Nyanthung Kikon chuan sipai hri kaite hi asymptomatic vek an ni a, an ngaihtuahawm lo tih a sawi. 

Union ministry of health and family welfare (MHFW) chuan Nagaland tan ventilator 45 a pe. State health minister Phom chuan ventilator hi mamawh dan azirin district tinah sem a ni dawn tih a sawi. Hri leng dona kawnga damdawi lam hmanrua mamawhte pawh a ṭul angin lei belh zel a nih tur thu a sawi  nghal bawk.